बिहुराम(बैसागु) बर'(Bihuram Boro)

बिहुराम बर'

जोनोम: 1940 इं माइथाइनि मागो दाननि 1 अक्ट ,बेंसिमारि गामियाव ।
थैनाय: 1990 माइथाइ 27 सेप्तेमबरनि बिस्थिबार ।
नखर: चन्द्र कान्त बाग्लारि(बिफा),मराय बाग्लारि(बिमा),जगदीस बाग्लारि(बिदा),मन'राम बाग्लारि(बिदा) आरो       हाउग्रि बाग्लारि(बिनानाव) । मुस्रिमा ललिता बर'(बिसि)
सोलोंथाइ: 1962 माइथाइआव दलगाव गोजौ फरायसालिनिफ्राय मेट्रिक आनजादखौ उथ्रियो । 1964 माइथाइआव बिथांआ कटन कलेजनिफ्राय आइ,एस सि फास जायो । 1967 माइथाइआव बि.ए. आरो 1980 माइथाइआव बि.टि. आनजादखौ मंगलदै कलेजनिफ्राय उथ्रियो ।
      1964-67 माइथाइआव भकतपारा गोजौ फरायसालिआव आरो 1967-69 माइथाइआव दण्ड चहरिया गोजौ फरायसालिआव लोगो फोरोंगिरि हिसाबै खामानि मावओ । 1971-73 माइथाइआव बेंसिमारि गोजौ फरायसालिनि आरो 1976 माइथाइआव गाव गायसन्नाय जयभद्र हागजेर मेम'रियेल गोजौ फरायसालिनि गाहाय फोरोंगिरि जायो ।
थुनलाइ सिबिनाय: 1973 माइथाइआव बिथांआ गंसे बानासुर मुंनि प्रेस गाइसन्ना सानस्नियारि “बनजार” रादाब बिलाइखौ सुजुयो । बिथांआ “गिबि बिथाय” मुंनि सल'न्थायमा आरो “आसारबा” मुंनि बाथौ धोरोमनि थुनलाइ बिजाबबो सुजुयो।
    बिथांआ 1968-71 माइथाइआव मंगलदै जिल्ला बड' साहित्य सभानि आरो बड' साहित्य सभानि गाहाय नेहाथारि जादोंमोन । 1974-77 माइथाइआव बड' साहित्य सभानि लेंआइ आफादगिरि जायो । बिथांआ आरोबाव खनसेबाव 1977-89 माइथाइआव बड' साहित्य सभानि गाहाइ नेहाथारि जाबावो ।
    बिथांआ बर' समाजनि थाखाय मेंआ जासे खामानि मावनानै बर' समाजखौ खोमसिनिफ्राय सारांआव बोखांबोदों। 1990 माइथाइनि 27 सेबतेम्बर,बिस्तिबार खालि सोरबा सिनायनो मोनि सुथुरआ पिस्टलजों खर'आव गावनानै बुथारो ।आगोमा बर' फिसा बिहुराम बर'आ अबथिरा जिउ खोमानांओ ।